الموت دليفرى

ذهبت الى عملى المعتاد وابتسامه كبيره على شفتى وقبل الذهاب مررت مع امى للحصول على المعاش..صادفتنا المعضله الاولى وهى المكروباصات التى يصر السائقين على كبسها بالبشر وكأنهم فى زريبة بهايم

طبعا التاكسى فى الصباح يكلف الشىء الفلانى وسيقوم بسرقتنا عينى عينك

فالمشوار ابو تلاته جنيه سيحسبه هو بسبعه ولن تفيد شجارتنا معه اذ سيأخد مايريده ف النهايه

طبعا مرمطة المكروباصات ارحم

وانا فى الطريق تذكرت نشرات انفلونزا الخنازير اللى بتطلب من المواطنين عدم التزاحم

ولو ان الزحام الايام دى صار يمر امامى باكثر من ذى قبل

اولا المكروباص او اللى بسميه انا علب السردين..وثانيا زحام المعاشات،سيدات من كل الاصناف ريفيات وحضريات..يتزاحمن عند شباك موظف المعاشات من اجل الحصول على المعاش.وخد عندك بقا من الامراض.

وبعد ازمة المعاش ازمة السوق

السيدات هناك يتزاحمن على بائعى الخضار فى سوق البلد الضيق رغم ان الحكومه قامت بانشاء سوق كبير بجوار السوق الصغير وواسست فيه مكانا لكل بائع..ومساحته معقوله ورغم تشطيبه من فتره بعيده الا انه صار مرتعا للذباب والقاء القمامه فيه رغم اناقته

طاب كان ايه لزمته من الاول؟

ولا يعنى بيورونا انهم شطار فى التشطيب

ياحرقة الدم.

وبعد السوق فى رحلة العوده بالمكروباص من جديد

ثم الذهاب اخيرا لمدرستى

ولانها مدرسه خاصه فلقد قاموا باخذ توقيعنا للانتباه لكل طفل قد ياتينا مصاب باى عوارض انفلونزا ولو كانت انفلونزا عاديه

كما قامت ادارة المدرسه بتقليل عدد الطلاب والتلاميذ فى كل فصل تحسبا للاصابه(اكتر ماكان العدد قليل..اللهم ارحمك يا مدارس الحكومه)

طبعا الحكومه مش واخده بالها ان الزحام شىء فارص نفسه علينا وكأنه بيقولنا وهو مطلع لسانه هتتعدوا بأنفلونزا الخنازير يعنى هتتعدوا

متفكرش ليه تعمل وسائل مواصلات اكتر او حتى ترحم الموظفين شويه وتديهم اجازه لحد ما الغمه دى تنقشع خاصة ان فى مصالح حكوميه بيروح الموظفين فيها يمضوا حضور وانصراف دفعه واحده ويخلعوا.يعنى كده ولا كده ملهمش لازمه.

طاب يدوهم اجازه احسن.

والمدرسين اللى مالهمش لازمه دلوقتى ف المدارس لان مفيش دراسه لازمن وختمن ولابد يعنى يروحوا الصبح يوروا وشهم؟

والمدارس الحكومى اللى اتأجلت فيها الدراسه كمان اسبوع هو يعنى الاسبوع ده اللى هيحل المشكله ويبعد الوباء ده عن ولادنا

مايقللوا عدد الطلبه فى الفصول اللى الفصل منهم بيشيل اربعين وخمسين تلميذ بيعدوا بعض بانواع مختلفه من الامراض.

ويحطوا دكتوره عليها القيمه ف المدرسه مش تمرجيه عامله نفسها دكتوره وهى ولا عارفه الالف من كوز الدره.

اظن التلاميذ كده مش هيجيلهم انفلونزا دده هيجيلهم الموت فورى

والمعاشات

مايخلوا المعاش يوصل لاصحاب المعاشات بالبريد

انشالله يخصموا تمن الظرف وطابع البوسته من المعاش

واهو يرحموا العواجيز من المشوار ويقللوا نسبة الاصابه بالمرض لا الامراض كلها اللى ممكن تنتج من الزحام

طبعا ده كله رغى فاضى لان الحكومه عارفه شغلها

واما تأجل الدراسه اسبوع تبقا هى عارفه بتعمل ايه

واما تسيب سوق كامل فاضى والناس تتزنق ف بعض ف السوق الصغير هى عارفه بردوا بتعمل ايه.

واما تخلى عواجيز تقف ف زحمه تجيب الموت من غير انفلونزا تبقا بردك عارفه بتعمل ايه.

واما تخلى التلاميذ يقعدوا عشرات ف فصل واحد بردوا هما عارفين المصلحه فين.

وسبحان الله

له فى خلقه شئون

وربنا يتولانا برحمته

نسيت اقول ان الابتسامه الكبيره اللى كنت رايحه بيها شغلى طبعا بعد المشاوير دى كلها

بقت تكشيره أأأأأأأأأأأأأأأااااااد الدنيا

:(