الأحد، 29 نوفمبر 2009

ياعينى علينا..محدش يعرف العيد فين؟

كل عيد وكلنا طيبين كل عيد وكلنا مسلمين الايام اللى فاتت مكنتش بعيد زى كل الناس لكن كنت بتفرج على عجائب الزمن..على الشعب المصرى الذى لايعرف كيف يفرح..شعب طيب جدا وذلك سبب انه اكثر الشعوب استهانة بكرامته..طبعا الطيبه ف هذا الزمن عيبه.,.لن اعود مجددا لموضوع ماجرى ف السودان..اخاف ان يكون هناك تواطؤ من اى نوع بين حكومتنا وبين ماجرى..ولكن لكى لا اظلم احد قررت ان اترك الموضوع لغيرى يبحث فيه .. ما ابحث عنه الان حق المواطن المصرى المهدور فى بلده حد شاف سعر كيلو اللحمه ف العيد وصل كام؟ 42 جنيه..يعنى لو فى ارمله بتقبض معاش السادات اللى هو فى الغالب حوالى 45 جنيه فلا اعتقد انها تقدر تشترى كيلو لحمه بالمعاش ,طيب تاكل لحد اخر الشهر منين؟وتجيب حق العيش منين؟ مفكرش ليه الريس يزود معاشها..او حتى يتبرعلها بكيلو لحمه تعيد بيه مع ولادها..؟ايه هو الريس مش لاقى؟اومال فلوس الضرايب فين؟ده حتى الايام دى بيفكر يفرض كمان ضريبه عقاريه..مش لاقيين حاجه يمصوا بيها دم الغلابه..بصيت يوم الوقفه من شباك اوضتى لقيت عمال النظافه بيكنسوا الشارع..تخيل يمشوا كيلو على رجليهم يكنسوا ويلموا زبالتنا بكام ف الشهر؟ 150 جنيه..مايطلعلهم ريسنا حتى مكافأة عيد ولا عيديه 50 جنيه مش معاه 50 جنيه لكل زبال؟ ايه اومال فلوسنا بتاعة الاسعار الزايده ف كل حاجه..وفلوس الغاز الطبيعى وكل الخدمات اللى ف مصر بتروح فين؟اموت واعرف ازاى يكون على مصر ديون وتاخد اعانات من الدول وهى عندها خدمات بتدخل ملايين وملايين؟ حق الغلابه فين ياريس العيد فين؟ مابتنزلش اسواق وتشوف الستات بتبيع ف كام ربطة فجل وجرجير عشان تلاقى 5 جنيه اخر النهار تأكل بيهم ولادها؟ مابتنزلش شوارع وتشوف عيال بتتنطط ف اشارات المرور وبتهدر كرامتها وآدميتها واوقات كتير شرفها عشان لقمة عيش متغمسه بالعار ايه ياريس مش شايف فى كام عاطل ف البلد وبلدنا ماليانه شغل ..بس لولاد الاكابر والوسايط بس؟ مش شايف الناس جاعت والشرف بيتهدر عشان لقمة العيش مش شايف الناس بتتعذب ف طوابير العيش والمواصلات والمعاشات هييجى العيد ازاى طيب واحنا مش عارفين له طريق؟ العيد ياريس لسه ما جاش عملتوا هوجه عشان ماتش اتلعب..وقلتوا كتير لا نسمح باهدار كرامة المصريين فين اللى اتعمل؟ فين رد الفعل ف حكومة مصر؟ خلاص ياشعب متدوروش على عيد العيد ف مصر مش هييجى ولو حد عرف له طريق يقوللى عشان معايا ناس غلابه كتير نفسها تعرف يعنى ايه عيد

هناك 40 تعليقًا:

adel يقول...

1-الفلوس فين؟؟؟
سؤال غريب قوي منك

في سويسرا او فينينا دور في البنوك هناك

2-الريس ينزل و يشوف ؟؟
الريس يوم مانزل راح كارفور
عشان سمع ان في تخفيض علي الزبادي هناك

noon kiko يقول...

ههههههههههههههه
والله ضحكتنى وانا ماليش نفس اضحك

Unknown يقول...

مرحباااااااا
كيفك ان شاءا لله تمااااام
معلش بعتذر جداً لانقطاعي طول الفترة الماضية وانا هلأ جيييييت

Unknown يقول...

كل عااام وانتي بألف خير ياااارب
وووين العيدية النص بالنص ههههههه

Unknown يقول...

ان شاءا لله ياااارب ييجي العيد القادم وامتنا العربية والاسلامية بتكون فااقت من نومها العميق
وان شاءا لله بتتحقق احلامك وامنياتك يااارب

بجد انا مبسووووط لسؤالك عني وربي ما يحرمني منك
وبخصوص موضوع المدونة انا هلأ جاااهز , وحيوصلك ايميل مني ان شاءا لله :)
سلاموووو

قلم رصاص يقول...


ماقلنا كده من الأول

قلنا بلاش ننساق ورا الحكومة في موضوع الماتش التافه ده عشان ميهلوناش عن الأزمات الداخلية .. على فكرة بقى .. القصة طلع ورhها صفقة سلاح كبيرة جدا بين الجزائر وشركة امريكية وكيلها وااااحد مش هقول اسمه .. بس هو طلع وقال كلام في التي في وعجب الناس اوي ايام الازمة .. اظن عرفتيه .. طيب متقوليش لحد بقى واستري علي هههههههه

وانا بأيد عادل دولا حبيبي في اللي قاله عن الفلوس .. هي فعلا بتروح سويسرا .. للأسف المخازن هناك احسن من هنا .. بعيد عن الفيران والحرامية الغلابة .. يعني صومن بوكمون ههههههههههههه

نسيت اقول لك : كل سنة وحضرتك طيبة
وعيد سعيد عليكِ وعلى الأسرة والأمة الاسلامية كلها

نصيحه ليها لازمة
---------------

ياريت تظبطي الخطوط شوية في مدونتك يا أستاذه .. او الافضل تغيري الاستايل بواحد خارجي بيكون رائع وخفيف وفيه مميزات عن بتوع بلوجر

لأنه خساره مدونة فيها كل الأفكار والأراء الجميلة دي تكون بالشكل ده

في امان الله

noon kiko يقول...

حازم
الاول كل سنه وانت طيب وكل ناس غزه بخير يارب
ثانيا بقا الحقنى وظبطلى المدونه الناس كلها اشتكت
انا المشكله مبفهمش ف تظبيط القوالب والطوب ده
ههههههههههه

noon kiko يقول...

قلم رصاص
ههههههههههههههههه
طبعا عرفناه
بس عارفه الحاجه اللى استفزتنى ف الموضوع انهم طبخوها صح
بس ده مايمنعش ان الجزائريين زودوها شويه بس ارجع واقول دى كوره واللى بيتعصبوا فيها كتير
المهم انى معاك ان الموضوع مش سهل وماخفى كان اعظم
الموضوع ده وراه مليون ان
بالنسبه لموضوع المدونه
فالاخ حازم هيتولى مهمة تظبيط المدونه
كل سنه وانت طيب بقا
وبلاش تنكش ف الكلام الكبير
انا مش بمشى ببطاقه الايام دى
ههههههههههههههه

قلم رصاص يقول...


مش بتمشي ببطاقه؟!

خلاص كويس اوي .. أنا هبلغ عنك
ههههههههههههههههههه


noon kiko يقول...

ادى جدعنة ولاد البلد ولا بلاش
هههههههههههههههههه

غير معرف يقول...

عندك حق

بس مفيش كرامه للمصريين جوه بلدهم علشان تبقى بره

لما يحترمونا وياكلوا الغلابه .... يبقوا يحافظوا على كرامتنا بره

تحياتي

blue-wave يقول...

الريس ينزل فين؟؟؟
يمكن قصدك على كارفور؟:))

Heba Gamal Emara يقول...

ايه ده كله ده
هو انا غبت كتير ولا ايه
دول هما 4 ايام بس
ارجع الاقى الدنيا ملخبطة كده
ماشى يا عم كلامى معكاى بعدين على كل الحاجات الوحشه اللى عملتيها وانا مش هنا
:):):)

ponpona يقول...

أنا جيييييت ... متأخر كالعاده بس اهو انا جيت بردو
عاجبني قوي شكل البلوج كده .. كلاسيكال ومختلف وكمان انا بحب اللون الرمادي

بالنسبه بقي للبوست فنو كومنت مش ع البوست يعني لأ ع الوضع اللي احنا فيه .. تعرفي .. انا مافيش حاجه استفزتني اكتر من كمية الاغاني اللي المفروض وطنيه اللي طلعت في الهوجه اللي فاتت دي بتاعة الماتش مانكرش ان في اغاني منهم حلوه فعلا بس بردو مش قادره اقنعني ان في تغير هايحصل .. انا لا اري النص الفارغ من الكوب ولكن الوضع حولي يفرض ان يزيد الفراغ فراغا يوما عن يوم وانا مابحبش الكلام الكتير من غير حاجه تتعمل يعني .. كل ما حاجه تحصل يطلعوا في كل مكان ويتقال كلام حلو قوي قوي بس مافي حاجه بتحصل وبعد الهدوء يبقي الوضع كما هو عليه ولن يمس احد كرامة المصري بشئ !! .. هما خلو فيها كرامه أصلا ماهماش شايفين اللي بيحصل .. ناس غريبه والله


آديني دخلت شمال اهو وماسلمتش عليكي حتي ...
ازيك بقي انتي عامله ايه؟ ..
بغض النظر عن كل الحاجات الللي في البوست .. إلا انه بردو عيد وانا اشتريت بلالين الصراحه .. كل سنه وانتي مبسوطه يانور علطول علطوووووول

:))

noon kiko يقول...

مروه
مرمورتى
معاكى حق
هما ضيعوا كرامتناواحنا جوه البلد يبقا هيردوها بره ازاى
كل سنه وانتى طيبه يا مرمر
:)

noon kiko يقول...

بلو وايف
هههههههههههههههه
اه والله معاكم حق
يادوب والله يشترى زبادى على رأى عادل
خلاص بقا
انا عرفت ان الريس مش فاضى لتفاهاتى دى
ههههههههههههههه

noon kiko يقول...

هبهوبتى
عملت ايه انا بقا
هو كل شويه انتى تتفسحى وتسبينى وبعدها ترجعى بعواصفك دى
ماشى
بس الفسحه كانت حلوه صح؟
الله يسهلك ياعم
اللهم لا نق ولا قر ولا حسد ولا حقد
:)

noon kiko يقول...

بونبونه
تصدقى بالله انا امبارح كنت بتكلم بردو ف قصة الشعب المصرى اللى مش فالح غير ف الاغانىحتى لما ييجى لقضية فلسطين مش فالح غير ف الاغانى
حاجه غريبه فعلا وياريتها جايبه نتيجه الا كلام وبس
زى قلته يعنى
بس يابنتى هى دى مصر الطبيعيه
سيبك انتى كله يطلع ف الغسيل

الزنارى يقول...

السلام عليكم
ما تسودهاش أوى كدة يا عم عالعموم كل سنة و انت طيب .
مع خالص الاحترام و التقدير
أحمد الزنارى

ameen يقول...

هههههههههههههههههههههههههاااااااااااااااااى


نيا هاهاهاهاتهاهاهاهاها ى

غير معرف يقول...

اذا تمردت على الله فانت تتمرد على كل جميل فالله لم يامر بقبح ولا غباء .اذا تمردت على الله فلتتزوج المحارم ولتزنى بهن فالله لم يامر بهذا وتمردك عليه يعنى انت تفعل كل ما نهى عنه فلتزنى بمحارمك اتستطيع ؟ اقول لك لن تستطيع انها الفترة التى خلقك الله عليها فلتقتل اباك او صديقك فلتسرق فلتنهب فلتغتصب وانت اذ تفعل فانت تتمرد على الله لانه ما امر بهذا لتدعوا اقربائك الى امتهان الزنا والرزيلة لتثبت تمردك على الله فقد نهى عن ذلك ارجو ان تعيد التفكير فى كلامك وفى طريقتك

الحــ ــزين يقول...

الحــ ــزين
متشكر لاهتمام حضرتك
دومتى فى رعاية الله

noon kiko يقول...

الزنارى
خلاص باعتنا لواحد نقاش ييجى يبيضها
ولا تزعل
هههههههههههههه

noon kiko يقول...

امين
ههههههههههههههههههههه
هع هع هع هع
ضحكات متقطعه شوريره

noon kiko يقول...

الحزين
كل سنه وانت طيب يا محمد

قلم رصاص يقول...

ألف مبروووووووووك على الاستايل الجديد
ايوا كده كويس اوي عن الاول

بس لو لونه فاتح شوية كان يبقى افضل بكتير
اولا هيكون خفيف في التصفح والتحميل لأن مش الكل نته كويس

ثانيا والاهم ان اللون الاسود بيدي ايحاء اليأس
واحنا مش ناقصينك هههههههههههههه

يلا في امان الله وشيلي البطاقة لأني خلاص هبلغ

ههههههههههههههه

غير معرف يقول...

السلام عليكم
أديني جيت المدونه أهه ؟
بس علي فكره انا شفتها من الأول طبعا
بس يمكن عشان أنا مش بحب الكلام في السياسه أوي
فضلت أضع تعليقي في المدونة الأخري

أتمني تكوني من المتابعين لمدونتي
تقبلي مروري

noon kiko يقول...

قلم رصاص
ياعم احمد ربك ان القالب اتغير اصلا ولا هو اكل وبحلقه؟
:)
بالنسبه للرحله
شكلها هتتأجل لانى تعبانه جداااااااااااااا

noon kiko يقول...

بلاك
انت تشرفنى ف اى حته
هنا وهناك بيتك بردو
واللى تحب تعلق فيه علق وانا طبعا زورت مدونتك وعجبانى جدا خاصة الاستايل بتاعها غير تقليدى
بس بجد شرفتنى
:)

ameen يقول...

ومصحف ربنا الضحكات دى من الهم

كان عندهم حق لما قالو ابليس طفشان من مصر

أسما يقول...

يا نورا... المدونة دي بتوجع قلبي، ده كفاية اتفرج علي الصور بس... مش ناوية تكتبي حاجة فرايحي عن مصر، حتي اضحكي عليا و قولي لي هترجعي تلاقيها جنة... المهم، انت عاملة اييييه؟ يا رب تكوني بخير
:)

noon kiko يقول...

امين
والله معاك حق
خلاص ابليس كفر من مصر ورايح بلجيكا
ههههههههههههههه
مياخدناش معاه؟

noon kiko يقول...

يعنى يا ايزو انا جبت حاجه من عندى؟
ثم فاكرانى زمان ايام ماكنت بنوته رومانسيه وكده
خلاص ده كان زماااااااااااااان
ف ظل الظروف المنيله بنيله ف الزمن ده
هحاول اخدعك البوست الجاى واقولك مصر بقت فينسيا العرب
ههههههههههه

all new articles يقول...

شكرا على المدونه الجميلة و بالتوفيق دائما

موقع اشتغاله يقول...

شكرا على مجهودك الرائع

for allah يقول...

مدونتك رائعة .. اعدك بالزيارة الدائمة انشاء الله .. كل التوفيق

whois domain find يقول...

شكراااااا على مدونتك الرائعة

جمعية كيان يقول...

اشكرا كثيرااا...مدونتك اكثر من رائعه

all uk sites informations يقول...

شكرا على مجهودك الرائع

pagerank checker tool يقول...

مقاله رائعه ومميزه جدااا...بالتوفيق دائما