البلد فيها كام 500 مليون؟

كنت قد عقدت النيه بالابتعاد عن اى اخبار مزعجه..انما كالعاده انا مصدر لكل ماهو مزعج..لذا تأتى الاخبار الى مكانى بالجاذبيه..كنت ابحث فى جوجل عن قصه بعنوان فيرونيكا قررت الموت وبدلا من ان تاتينى فيرونيكا اتتنى دون معرفة كيفية حدوث ذلك لينك موقع احدى الجرائد..لم ارى ضررا فى تصفح الاخبار وليتنى مافعلت هناك خبر يقول انه سيتم هدم مستشفى خيرى تمت البدء فى انشاؤه فى عام 1999 وانتهوا من تشطيبه عام 2006

المستشفى تكلف 500مليون جنيه

500مليون

جنيه

وسبب هدمه لان حى مدينة نصر قرر فجأه هدمه...؟

فكرونى بالمحافظ السابق لمدينتنا سوهاج..كان كل كام يوم نلاقيه بيبنى نافوره ويادوب اسبوع نلاقيه هدها عشان يعمل مكانها جنينه وبعدين كمان اسبوع ويهدها ويرجع يبنى نافوره..كل ده بفلوس اللى خلفونا..ولا يعنى جابوه من بيت ابوهم..!!!!

المهم ان المستشفى دى كانت هتخدم 2000مريض شهريا من محدودى الدخل..طيب عروستى ؟على رأى ماما ساميه شرابى..ممكن حد يوضحلى؟

ايه يعنى مستشفى بالرقم القياسى ده تتهد ف يوم؟

الجمعيه الشرعيه الطبيه اتفاجأت بالقرار ده وتركت الامر للقضاء العادل اوى جدا عشان يقول كلمته..واكدت ان المستشفى تم بناؤها وفقا لكل اشتراطات البناء..يعنى مفيهاش عيب

هنقول مثلا يمكن عشان الارض مثلا كان عليها خلاف واكتشفوا انها مش ملك المستشفى طيب ما يسوو الخلاف ويسيبوا المستشفى..هنقول لقينا اصحاب المستشفى حراميه..خلاص سيبوا المستشفى وخدوا الملاك..واهو خساره الفلوس وتخدموا بيها الناس..حولوها لمستشفى حكومى..اتصرفوا..ولا مش بتشوفوا مرمطة الغلابه فى مستشفيات اليوم الواحد والتأمين الصحى؟والله انا هموت واعرف هى الحكومه دى مش عايشه ف مصر؟

يعنى يمكن هما عايشين ف ساحل العاج وبيتابعوا شئون الناس من هناك.!!.طيب ممكن لو سمحتوا تخلوا عندكم دم وتيجوا تشوفوا الناس اللى اتبهدلت ف المستشفيات وف الشوارع..شوفوا اللى بيسرق كلاويهم وكبدهم وطحالهم لو لقى عندهم طحال اصلا وهما اساسا داخلين يشيلوا اللوز..

ياربى الرحمه

هو يعنى البلد فيها كام500 مليون بيطولها الغلابه

اللهم لااعتراض على حكمك..